कार्तिक २४ देखी २६ सम्म सत्यवती वजैको मेला लाग्ने

तिनाउ राष्ट्रिय समाचार

पाल्पा
२० कार्तिक ०७६
विष्णु घिमिरे
आगामी कार्तिक २४ देखी २६ गते सम्म सत्यवती बजैको मेला लाग्ने भएको छ । यो वर्ष कार्तिके पूर्णिमा परेको कारण सत्यवती पूजा आजा गरिने भएको हो ।
कार्तिक महिनामा पूर्णिमा परेको वर्ष तिनाउ ४ कोल्डाडाको सत्यवतीमा सत्यवती मेला लाग्ने मन्दिर व्यवस्थापन समितिले तिनाउ गाउपालिकामा आयोजित पत्रकार सम्मेलनमा जानकारी दिएको छ ।
सत्यवती मन्दिर व्यवस्थापन समितिका अध्यक्ष तिल बहादुर रानाले यो वर्ष जोग परेका कारण सत्यवती मेला व्यवस्थित बनाउन लागिएको बताउनुभयो । पत्रकार सम्मेलनमा तिनाउ गाउपालिका पाल्पाका अध्यक्ष ओम बहादुर घर्तीले धार्मिक तथा पर्यटकिय स्थल क्षेत्र सत्यवतीको विकास र प्रचार प्रसारमा गाउपालिका लागि परेको बताउनुभयो ।
यो वर्ष ३ लाख श्रदाजु भक्तजनहरुले सत्यवती वजैको दर्शन गर्ने तिनाउ २ का वडा अध्यक्ष राजेश श्रेष्ठले बताउनुभयो । सत्यवती वजैले कानले नसुन्ने भएका कारण चिच्याएर बर माग्ने गरिन्छ । यसरी चिच्याई चिच्याई बर माग्ने नेपालकै एक मात्र धार्मिक स्थल सत्यवती मन्दिर मानिन्छ ।
भक्तजनहरुको घुइचोलाई व्यवस्थापन गर्न मन्दिरमा सवारी साधन प्रवेशमा रोक लगाईएको सचिव लाल बहादुर दर्लामीले बताउनुभयो ।

४ रोपनी क्षेत्रफलमा फैलिएको सत्यवती ताल सिमसार क्षेत्रमा पर्ने दुर्लब ताल हो । सत्यवती मन्दिर एवम् ताललाई ३ पटक घुमेर चिच्याएर बर माग्ने चलन छ । ताल घुमिसकेपछी तालको छेवैमा लिङगो गाड्ने चलन छ । मन्दिरमा पुजा गर्ने, परेवा उडाउने, बोका, हाँस, राँगा लगायतका पशुहरुको वली दिने चलन रहि आएको छ । सत्यवती मन्दिरमा चिच्याएर बर माग्दा मनोकाङक्षा पुरा हुने धार्मिक विश्वास रहि आएको छ । झुम्साको पानीमिलबाट करिव ६ किलोमिटर तथा चौविसमाइलबाट हिडेर सत्यवती मन्दिर पुग्न सकिन्छ ।