पाल्पा । जिल्लाकै प्रमुख पर्यटकीय गन्तव्यका रुपमा विकास भइरहेको रानीमहलमा राष्ट्रिय महिला बिच भलिबल प्रतियोगिता सुरु भएको छ । कालीगण्डकी किनार रानीमहलको काखमा सञ्जय मेमोरियल राष्ट्रिय महिला बिच भलिबल प्रतियोगिताको तयारी पूरा भै सुरू भएको प्रतियोगिता २६ चैत्र सम्म हुने छ । प्रतियोगितामा सातै प्रदेशसहित नौ टिमले प्रतिस्पर्धा गर्ने छन् । रानीमहल तानसेन नगरपालिका–१३, बौघागुम्हामा पर्छ भने त्यसको परिसर बगनासकाली गाउँपालिका–७, खानीगाउँमा पर्छ ।

प्रतियोगितामा प्रदेश १, मधेस, बागमती, गण्डकी, लुम्बिनी, सुदूरपश्चिम र कर्णाली प्रदेशका साथै विभागीय टोलीहरू नेपाल पुलिस क्लब र सशस्त्र प्रहरी बलको एपिएफ क्लबले भलिबल प्रतियोगितामा भाग लिएका छन् ।

भलिबलका लागि नेपाल पुलिस क्लबबाट कमला पुन र मनिसा कुमारी चौधरीको जोडी रहेका छन् । यस्तै एपीएफ क्लबबाट रेश्मा भण्डारी र निरुता ठगुन्नाको जोडी रहेका छन् । त्यस्तै, प्रदेश १ बाट अञ्जना लिम्बु र प्राशी गौतमको जोडी रहेका छन् । मधेस प्रदेशबाट नेहाकुमारी चौधरी र सविनाकुमारी चौधरीको जोडी रहने आयोजकले जानकारी दिएका छन् ।

बागमती प्रदेशबाट रोजीना कुमाल र मोनीका महतोको जोडीले प्रतिस्पर्धा गर्नेछन् । सुदूरपश्चिमबाट भागिरथी जोशी र बबिता बोहोराले प्रतिस्पर्धा गर्नेछन् । कर्णाली प्रदेशबाट आहाराकुमारी शाही र हीरा जैसीको जोडी छ । लुम्बिनी प्रदेशबाट भावना डाँगी र सरस्वती कट्टेल रहेका छन् । गण्डकी प्रदेशबाट पवित्रा बिसी र रेवीना घर्ती मगर रहेको नेपाल भलिबल संघका प्रदेश १ का महासचिव लेखनाथ पराजुलीले जानकारी दिनुभयो।

गर्विलो इतिहास बोकेको पाल्पा जिल्लाका लागि एउटा थप ऐतिहासिक इभेन्ट राष्ट्रियस्तरको महिला विच भलिवल प्रतियोगिता भएको नायक धीरेन शाक्यले बताउनुभयो । विच भलिवलको इतिहास नेपालमा छोटो भएतापनि हालसम्मका प्रयास र प्रयत्नहरुले यस खेलको भविष्य उज्वल छ भन्ने देखिएको उहाको भनाई छ । ‘बिजेता पहिलो हुनेले नगद १ लाखका साथै ट्रफी, मेडल तथा प्रमाण पत्र पाउनेछन् भने दोस्रो हुनेले नगद ५० हजार र ट्रफी, मेडल तथा प्रमाण पत्र पाउने छन् । सहभागी खेलाडीहरुलाई आतेजाते यातायात खर्च, खाने बस्नेका साथै केही रकमसमेत दिइने आयोजकले जनाएको छ । उत्कृष्ट खेलाडीका लागि नगद ३५ हजारका साथै ट्रफी,मेडल तथा प्रमाण पत्र रहेको छ ।

प्रतियोगिता सञ्चालका लागि अन्तर्राष्ट्रिय भलिबल रेफ्री गौतम प्रसाद लासिवा, एसियन रेफ्री क्याण्डीडेट विजय केसी र विकास गुरुङ रहेका छन् । पाल्पा रुपन्देही र कास्की जिल्लाका राष्ट्रिय रेफ्रीहरुका साथै पाल्पा जिल्लाका प्रादेशिक रेफ्रीहरु रहने सल्लाहकार तथा पाल्पाली संगमका अध्यक्ष पदम न्यौपानेले बताए । प्रतियोगिता विहान ७ बजेदेखि बेलुका ५ बजेसम्म लिग कम नकआउटका आधारमा हुनेछ । सहभागि सम्पुर्ण खेलाडीहरुका लागि २ लाख बरावरको बिमा गरिएको छ ।

सहभागि सम्पूर्ण खेलाडीकालागि खेल पोशाक दिइने छ । प्रतियोगिता सम्पन्न गर्न लुम्विनी मेडिकल कलेज पाल्पा, श्रीनगर होटल पाल्पा, श्रीनगर यातायात सेवा कम्पनी प्रालि, नेपाल खेलकुद पत्रकार मञ्च, डिजी प्रिन्टले सहकार्य गरेका छन् । संघीय युवा तथा खेलकुद मन्त्रालय, प्रदेश खेलकुद मन्त्रालय, राष्ट्रिय खेलकुद परिषद्, प्रदेश खेलकुद् परिषद्, नेपाल भलिवल संघ, तानसेन नगरपालिका, वगनासकाली गापा, उद्योग वाणिज्य संघ, पाल्पा व्यापार संघ, पाल्पाली ढाका संघ, होटल संघ पाल्पा, तानसेन गुठी काठमाण्डौ, पाल्पाली संगम काठमाण्डौ लगायतको साथ सहयोग रहेको छ ।