Share
  •   
  •  
  •  
  •  

पाल्पा । ९ जेठ । ०७८
सिद्धार्थ राजमार्गको सिद्धबाबा सडक खण्डमा सुरुङ मार्ग बनाउन टेण्डर आह्वान भएको छ । गत मंसिर १ गते बसेको मन्त्रिपरिषद् बैठकले उक्त सुरुङ मार्ग निर्माणका लागि १० अर्ब १५ करोड रुपैयाँ प्रदान गर्ने निर्णय गरेको थियो ।

अर्थ मन्त्रालयले भौतिक पूर्वाधार तथा यातायात मन्त्रालयलाई ठेक्का प्रक्रिया अघि बढाउन गत मंसिरमै सहमति प्रदान गरेको थियो । सोही अनुसार सडक विभागले आइतबार ४५ दिने सूचना प्रकाशित गर्दै ग्लोबल टेण्डर आह्वान गरेको हो । टेण्डर आह्वानसँगै सुरुङ मार्ग निर्माणले मूर्तरूप पाउने आशा गरिएको छ ।
स्वीस एजेन्सी फर डेभलपमेन्ट एण्ड कर्पोरेशन एसडिसीले गरेको अध्ययनको प्रतिवेदन अनुसार टेन्डर आह्वान भएको सडक विभागले जनाएको छ । सुरुङ्गमार्ग १ किलोमिटर १२६ मिटरको हुनेछ । सुरुङमार्गको सुरु हुनुभन्दा अगाडि र पछाडि ३ हजार ५ सय मिटरको रकनेट जाली राखिने छ । सुरुङमार्ग ५ वर्षभित्र बनाइसक्नुपर्ने भनिएको छ । सिद्धबाबा खण्डको डेढ किलोमिटर क्षेत्र पहिरो र दुर्घटनाको अत्यधिक जोखिमयुक्त क्षेत्रमा पर्छ । हरेक वर्ष वर्षा याममा मात्र नभई हिउँदमा समेत पहिरो खस्दा जनधनको क्षति हुने गरेको छ ।
गएको १० वर्षमा सिद्धबाबा खण्डमा पहिरो खस्दा र दुर्घटना हुँदा ७० जनाभन्दा बढीको मृत्यु भएको ६० भन्दा बढी सवारी साधन दुर्घटनामा परेर पुरिएका सडक विभागको तथ्यांक छ । यो सडक खण्ड प्रयोग गरेर पाल्पा, गुल्मी, अर्घाखाँची, स्याङ्जा, पोखरा, बाग्लुङ हुँदै म्याग्दीसम्म गाडी चल्ने गर्छन् ।